المينى بيتزا
المكونات
1 كيلو دقيق
معلقه كبيره ملح
معلقه كبيره سكر
20 جرام خميره فوريه
ربع كوب زيت زيتون
حوالى نصف لتر ماء دافىء للعجن
الطريقه هجيب الدقيق وهحط عليه الزيت والسكر والملح والخميره وهقلبهم كويس بعد كده هحط المايه الدافيه وهبداء بالعجن كويس جدا لحد ما العجينه تتماسك معايا هركنها على جنب واغطيها ببلاستيك لحد متخمر وابدا اجهز فى الصوص بتاعى
مكونات الصوص
بصله مفرومه
2 فص ثوم مفروم
معلقه صغيره زعتر
معلقه ريحان بودره او فريش
معلقه صغيره روزمارى
2 معلقه صلصه بوريه
3 كوب عصير طماطم
ملح فلفل اسود
فى حله ع النار فيها شويه زيت بسيطه جدا بنزل بالبصل المفروم وبقلب كويس وقبل مالونه يغير بنزل بالثوم وبقلب كويس بعد كده الصلصه البوريه وبقلب كويس بعد كده عصير الطماطم وبسيبها تتسبك وبعد كده بضيف الزعتر والروزمارى والريحان والملح والفلفل
عمل البيتزا والتسويه
بعد خمران العجينه ببداء بتشكيلها وتقطيعها بقسمها على اربع اجزاء كل جزء بفرده لوحده كويس بالمردانه سمك 1 سم وبعدين بجيب قطاعه او حتى كوب او ممكن علبه تونه عشان اقطع بيها العجينه الى قطع صغيره دائريه الشكل وبعد كده بجيب صاج بدهنه زيت بسيط جدا وبحط فيه قطع البيتزا وبسيب الصاج ده لمده 10 دقايق عشان العجينه تخمر تانى وتكون هشه وفى نفس الوقت طريه وبعدين بحط عليها المكونات اللى بنحبها والافضل للاطفال انى احط زيتون فيليه وفلفل الوان وبعدين بحط الجبنه المودزاريلا المبشوره على كل قطعه وبدخلها فرن ساخن حتى التسويه وبعد كده بخرج الصاج واشيل قطع البيتزا واقدمها بالهنا والشفا الشيف ايمن العطار
