الكشرى المصرى الاصيل بطريقه ولا اسهل ولا اروع وبطعم ونكهه محلات الكشرى الجميله هنعمله فى البيت
المكونات
1 كيس مكرونه اسباجتى
1 كيس مكرونه مقصوصه
ربع كيلو عدس اسود
2 كوب ارزمغسول
ربع كيلو حمص منقوع ومغسول
نصف كيس شعريه
1 بصله كبيره مقطعه شرائح ومحمره فى الزيت بعد رشه بمعلقه دقيق ورشه ملح صغيره وده عشان يقرمش معاكى وانتى بتقليه يكون الزيت سخن وغزير
كمون وملح
دى مكونات الكشرى الاساسيه
هنقول مكونات الصلصه ودى مهمه جدا عشان طعم الكشرى
3 كوب عصير طماطم
2 معلقه صلصه معجون
2 معلقه كبيره كمون
ربع كوب خل
2 معلقه كبيره ثوم مفروم
1 بصله كبيره مفرومه ناعم جدا
1 معلقه كبيره كزبره ناشفه ناعمه
مكونات الدقه المصريه الاصيله عشان اللى بيحب الدقه هتكون عباره عن
1 معلقه كبيره ثوم مفروم
1 معلقه كمون
ملح وفلفل اسود
ربع فنجان خل مع نصف فنجان مايه
وهنقلب كل مكونات الدقه دى مع بعضها ونحطها على النار لمده 5 دقايق لحد ماتغلى
طريقه العمل للكشرى
وناخد بالنا منها كويس
هنسلق المكرونات كل نوع لوحده فى حله فيها المايه المغليه وملح وزيت على عند سلق المكرونه الاسباجتى نكسر ها على نصين قبل السلق وبعدين هنرفع المكرونات من ع النار ونبرد عليها بطريقتنا المعتاده ومهم جدا ان المكرونه تكون مسلوقه سلق كامل مستويه يعنى وبعد مالمكرونه تبرد هنرشها بشويه كمون صغيره ونقلبها كويس
وبعد كده هنعمل الارز الابيض بطريقتنا المعتاده لكن هنسقى الارز بمايه مش بشوربه يعنى لما تعملى ارز الكشرى الابيض تسقيه بمايه مغليه فقط والملح مش تحطى ماجى ولا اى نوع شوربه وده مهم جدا
بعد عمل الارز هنرفعه من ع النار وبعدين فى طاسه او حله نحمر الشعريه مع شويه زيت وبعد التحمير هنرفعها من الزيت ونصفيها كويس وبعد كده هنسلق الشعريه بعد تحميرها زى سلق المكرونه بظبط
وهنسلق العدس الاسود ونصفيه بعد السلق وهتبله بمعلقه كمون وشويه ملح وهنسلق الحمص ونصفيه ونتبله بمعلقه شطه ومعلقه كمون وبكده هتكون مكونات الكشرى الاساسيه جاهزه نبتدى نعمل الصلصه المتحبشه بتاع الكشرى
فى حله ع النار فيها شويه زيت هنحط الثوم المفروم مع البصل المفروم ونقلب كويس جدا لحد مالثوم البصل يبتدوا يتحول لونهم للدهبى هنحط الخل مباشره وبعده عصير الطماطم ومعجون الطماطم مع التقليب ونتبل بالكمون والملح والفلفل والكزبره الناعمه ونسيب الصلصه تغلى ع النار كويس جدا لحد ماتتقل معاكى
وبكده يكون الكشرى بتاعنا جاهز وعند التقديم هنغرف الاطباق بتاعتنا اننا نحط الارز الاول فى الطبق ثم المكرونات ثم الشعريه ثم العدس وبعدين الصلصه وبعدين الحمص والبصل وكمان اللى بيحب الشطه
هنجيب كوب عصير طماطم ومعلقه صغيره من الصلصه المعجون ونحط عليهم معلقتين من الشطه البودره ومعلقه كبيره زيت ونقلبهم كويس ونحطهم يغلوا ع النار لمده 5 دقايق وبالهنا والشفا
